Le Parlamento Europee representa ultra 370 milliones de personas
Traducite de Europa Oggi per Ensjo. |
Le unic Assemblea international
electe in le mundo: isto es le Parlamento Europee pro le qual le citatanos del dece-cinque
Statos-Membros del Union essera appellate al voto le 13 de junio. Un Assemblea nascite in
1952, in le sino del CECA, que desde 1979 ha essite eligite per suffragio universal
directe. Illo hodie representa 374 milliones de personas, un numero impressionante al qual
iste institution da voce politic in Europa. Le
evolution del tres communitates originari — CEE, CECA e Euratom — e le
ampliamento del sectores de competentia del Union ha rendite tal Assemblea sempre plus
importante pro le citatanos "de Europa".
Initialmente le parlamentarios europee habeva
competentias limitate, como le approbation del balancio e le controlo sur le altere
Institutiones (Commission e Consilio), ma ha progressivemente acquirite major fortia in le
exercitio del poter decisional traditionalmente attribuite al Consilio sol, composite per
le ministros del Statos-Membros.
Gratias al Acto Unic de 1986 primo, al Tractato de
Maastricht postea e in fin al Tractato de Amsterdam, cuje entrata in vigor es proxime, le
Assemblea de Strasbourg executa ja un rolo determinante in le processo de elaboration,
modification e adoption del legislation europee. Le eurodeputatos formula propositiones
politic pro le reinfortiamento del Union e es directemente dedicate al tutela del derectos
human e del citatano.
Le poteres attribuite al Assemblea ha evoluite
parallelmente al acquisition de un "conscientia europee" del parte del Statos e
del populos. Equalmente se ha ampliate le sectores de competentia del action communitari e
le materias in le quales le Union es appellate a pronunciar se ha augmentate in
comparation con le passato.
Le labor de cata singule deputato influentia directemente
multiple aspectos del vita quotidian del electores: desde normas in materia de labor al
moneta unic, desde le libere circulation de merces, personas, servicios e capitales al
agricultura, al industria, al ambiente e al sanitate.
A transverso del electiones del proprie representantes al
Assemblea de Strasbourg le citatanos participa dunque activemente in le edification de
Europa. Le deputatos electe a junio contribuira, con lor decisiones, al disveloppamento
del societate civil e politic del Union Europee pro le prime legislatura del tertie
millennio, le quinte in le historia del Parlamento electe a suffragio universal directe.
|
