| Post que Austria ha recipite le Presidentia del Consilio ab
Britannia le prime de julio, ora cresce le anxietate que le data del allargamento del UE
pro acceptar paises del est europee e Cypro essera postponite durante que le referite
paises se effortia pro attinger le standards del UE. Presentante le programma del
presidentia Austriac, le ministro del affaires estranier Wolfgang Schüssel, al mesme
tempore in que ille emphatizava le compromisso de su pais con le promotion de stabilitate
politic e progresso economic in le continente al longo del allargamento, non habeva dubita
del magnitude del defia de integrar le paises del est europee in le UE.
Iste allargamento exigera un preparation prudente, diceva Sr. Schüssel, in vista del
considerabile differentias inter le statos candidate e le Union. Sub le presidentia
britannic esseva formalmente initiate negotiationes super un tote serie de areas de
politicas, ma Sr. Schüssel adverteva que non solo le nove paises debera facer effortios
vigorose, ma le UE debera facer reformas importante ante que le allargamento pote
continuar.
Ille diceva: "Le Union mesme actualmente non es ancora in un stato apte pro
acceptar nove membros." Ille se refereva particularmente al reformas del Politica
Agricole Commun (PAC) e del fundos regional e, malgrado que le presidentia britannic
succedeva fixar martio de 1999 como un data-limite pro un accordo super le reformas, il
non ha ancora un idea clar de como isto va resultar. Le deputatos ha expressate dubitas
super si le planos del Commission que le financiamento del UE continua intra le actual
tecto de 1,27% del PIB essera sufficiente pro pagar le disveloppamento economic necessari
in le nove paises. De facto, le presidentia austriac essera responsabile per tentar
attinger un accordo in le directivas financiari pro le periodo 2000—2006 contra un
circumstantia del statos membros le plus ric cercante reducer lor contributiones.
Austria, con un frontiera de 1.400km con quatro candidatos a statos membros —
Hungaria, Slovenia, Slovachia e le Republica Chec — es anxie que un data troppo
precoce pro le allargamento poterea ducer a un torrente de immigrantes ab le est europee
cercante empleos in le stato membro le plus proxime.
Un reporto estima que il prendera 25 annos al taxas actual de crescimento pro que le
receptas in le nove statos membros attingera solmente le medietate del nivello del media
actual in le UE.
Ma in le debatto, deputatos como Friedheim Frischenschlager (A, ELDR) incitava le
presidentia a esser coragiose e acceptar que ille paises vole desperatemente pertiner al
UE e toto que illo representa in terminos de pace e stabilitate.
Essente iste le caso, le unic criterio deberea esser si, o si non, le reformas politic
necessari pro stabilir un democratia genuin ha essite facite, e le transition verso un
economia de mercato, interprendite.
Tranquillizar le citatanos europee que bastante es facite pro attaccar le crimine
international in un era de frontieras aperte esseva altere prioritate, e hic Dr. Schüssel
expecta plus de cooperation policial quando le Europol venira al currente plus tarde in le
anno.
Le Tractato de Amsterdam tamben es preste a entrar in vigor, sequente ratification in
le statos membros expectate circa le fin del anno e Dr. Schüssel recognosceva que isto
involvera un cooperation plus intime inter le Consilio e le Parlamento Europee in affaires
legislative.
Le Tractato provide un simplification del proceduras e permitte que leges sia approbate
post un sol lectura si le Consilio e le Parlamento arriva a un accordo in un stadio
initial. Le Parlamento tamben stabiliva su proprie reformas interne pro adaptar se al nove
Tractato.
|
