Interlingua —
Le linguas del civilization occidental pote esser
vidite como un unic si in cata un de illos le
tractos que lo distingue del alteres es
disconsiderate. — Le resultato es
Interlingua, que differe del linguas que illo
coperi como un typo differe del individuos que
illo representa.
Interlingua es francese
modificate per espaniol, anglese, italiano...
Illo es italiano modificate per portugese,
germano, latino... Illo es latino modificate per
francese, anglese, espaniol...
Illo es le lingua commun del
civilization occidental e es comprendite —
como un version simplificate del lingua de uno
— ubicunque que le influentia de ille
civilization es recognoscite.
|
Observa le sequente
parolas: abbreviation, abdication, abduction,
abjuration, abolition, abomination, aborigines,
absolute, absorption, abstention, abstraction,
acacia. Iste parolas existe in anglese e
francese e, con minor variationes in graphia,
tamben in italiano, espaniol e portugese. Perque
illos es anglese, francese, italiano, espaniol e
portugese, illos pote esser appellate
international. De facto, illos ha essite seligite
aleatorimente del prime paginas de un
dictionario de Interlingua, ubi illos se situa
inter milles de parolas similar. Interlingua es
le nomine date per un association appellate
I.A.L.A. a su compilation, in 1951, del major
parte del elemento commun del linguas del
civilization occidental.
Como Interlingua esseva create
Le International Auxiliary Language
Association de New York era fundate in 1924 per
suggestion de F. D. Cotterell del International
Research Council, post discution del problemas
del linguas auxiliar per commissiones de iste e
altere organos academic influente, includente le
Associationes Britannic, Francese, Italian e
American pro le Avantiamento del Scientia.
Le prime annos de I.A.L.A. esseva occupate in
le divulgation del question de un lingua auxiliar
inter scientistas e linguistas generalmente. Al
Secunde Congresso International de Linguistas
(Geneva, 1931) un carta de recommendation
exprimente appoio al programma de I.A.L.A.
portava le signaturas de non minus que
vinti-septe linguistas de distinction, includente
illos de Bally, Cohen, Debrunner, Mellet,
Schrijnen, Sommerfelt, Trubetsky e Vendryes. Sub
le auspicios de I.A.L.A. esseva publicate un
numero de monographias super questiones
linguistic, includente le serie "Foundations
of Language" de Prog. Sapir, "Semantic
Frequency List" de Eaton, "Language
Learning" de E. L. Thorndike e
"Cosmopolitan Conversation" de Shenton.
Le culmine de iste varie labores esseva le
projecto de isolar e codificar le elementos
commun in le linguas occidental. Autorizate in
1933, e appoiate per un subvention del Fundation
Rockfeller, le travalio comenciava in Liverpool
in 1936, sub le capace direction de William
Collinson, alora professor de germano e detentor
del unic sede de Esperanto in le universitate de
ille citate. Le guerra duceva le recerca a un
abrupte halto, ma un nove equipa esseva formate
in New York per Clark Stillman, sub cuje
direction, e posteriormente sub illo de Prof.
Martinet, le travalio continuava. Plus que a
qualcunque altere homine, le honor e le
responsabilitate del production de Interlingua
debe ir a Dr. Alexander Gode, sub cuje direction
le projecto esseva completate in 1951.
Le methodo involveva le stabilimento de quatro
linguas de controlo, contra le quales le
internationalitate de parolas date poterea esser
testate. Le selegites esseva anglese, francese,
italiano e espaniol/portugese prendite como un
unitate. Altere grande linguas esseva excludite,
perque lor uso como "controlos",
malgrado complicar multo le procedimento de
extraction, non haberea effectos observabile in
su resultatos.
Le continuation de
iste texto es in le introduction del paginas:
|
