Traducite de Tribuna da Europa per Ensjo. |
Le Tractato de Amsterdam
previde le realization de un reforma institutional como condition previe pro qualcunque
futur allargamento del UE. In le momento quando le conversationes con le candidatos
attinge lor velocitate de cruciera e le UE se prepara pro clauder un dossier absolutemente
vital pro su futuro e pro le successo del allargamento, le Agenda 2000, le PE prepara ja
le die de deman, lanceante le colpo de pede initial del reforma institutional que debera
render le UE plus democratic e transparente e garantir al mesme tempore su efficacia,
evitante le risco de paralyse de su processos de decision un vice que le numero de su
membros ultrapassa vinti. Non mancara illes qui
minimizara iste initiativa del PE, accentuante su character mermente politic,
insusceptibile de vincular le altere institutiones o le Statos-membros. Mais isto esserea
minuspreciar le rolo de impulso del PE, su capacitate pro determinar le germines del
grande transformationes del construction communitari. Bastara recordar que le grande
modificationes que le Communitate ha cognoscite con le Acto Unic o con su transformation
in UE (tractato de Maastricht) ha constituite, in le fundo, un reaction al projecto del
constitution del UE contenite in le celebre reporto de Altiero Spinelli. De alcun modo, le
PE pensa que su actual initiativa potera venir a haber un rolo catalytic similar. E viste
que le Presidentia german ha annunciate ja su intention de convocar un Conferentia
Intergovernamental pro le reforma del tractatos pro 2001, es comprensibile le importantia
que le initiativa del PE assume.
Isto se ha consubstantiate, per ora, in tres reportos,
mais alteres sequera, super varie aspectos del referite reforma. Un de illos, elaborate
per le socialista portugese José Barros Moura, appella le attention verso le
transformationes de ordine constitutional que le advento del euro exige, pro poner un fin
al disequilibrio que UEM suffre inter su [vertentes] monetari e economic e al deficit
democratic que resulta del creation de un autoritate monetari commun (le BCE) sin le
pendant de un correspondente autoritate politic. Pro illo, le reporto propone que le
decisiones de fixation del orientationes general del politica economic e del decisiones
relative al supervision multilateral assume un character vinculative, essente prendite per
le Consilio, per majoritate qualificate, sub proposition del Commission e post evalutation
favorabile del PE.
Le reporto avantia tamben propositiones innovative a
nivello del grande politicas europee, defendente, a saper, que le Union Monetari exige un
systema budgetari de inspiration federal, o, al minus, un mechanismo institutional e
financiari que permitte abbordar un situation de crise in un o plure Statos-membros. Al
mesme tempore, illo considera que le gestion unificate del politica monetari exige un
approximation del politicas fiscal national. A nivello del politica social, le PE appuncta
le creation de un ver modello social europee, malgrado sin poner in periculo le progressos
ja attingite in thema de reduction del deficit public e del stabilitate budgetari.
Le texto del deputato portugese defende ancora le
recognoscentia del Consilio Euro (per ora, componite solmente per dece-un Statos-membros)
e un representation unic del UEM in le plano exterior, le qual debera seder se super le
representation tripartite Consilio Euro, Commission, Presidente del BCE.
Majoritate qualificate in le Consilio
Le altere reporto tracta del modificationes a
introducer in le Consilio, abbordante supertoto duo questiones decisive: le decision per
majoritate qualificate e le ponderation del votos.
In un UE con vinti-un o plus (vinti-sex?) membros il es
impossibile que le Consilio continua a decider per unanimitate, sub risco que le processo
de decision resta completemente paralysate. A causa de isto, le PE defende le
generalization del decision per majoritate qualificate, del qual solmente debera restar
exempte le grande questiones de natureza constitutional (revision del Tractatos, adhesion
de nove membros), in le quales le unanimitate debera continuar in vigor. Naturalmente,
iste question del extension del decision per majoritate qualificate interfere con le
question del ponderation del votos del quales cata Stato-membro dispone in le Consilio: le
relator propone le manutention del actual equilibrio, que combina le diversitate
demographic con le superrepresentation relative del Statos de medie e basse population. Le
reporto admitte mesmo le possibilitate que le tractato venira a consacrar un systema de
duple majoritate, mais le majoritate ha rejectate alcun partes que stabiliva un relation
inter le majoritate de Statos e le majoritate del population, hypothese, a proposito,
denunciate per alcun deputatos, le quales ha rememorate que le representation del populos
se face in le PE, durante que le Consilio representa le Statos, motivo pro le qual uno non
debe superestimar le differentias demographic al nivello del ponderation del votos de cata
Stato-membro in le Consilio. Nonobstante, le texto finalmente approbate contine ancora un
referentia que va verso ille direction.
Un spatio de libertate, democratia, securitate e justitia
Finalmente, le tertie reporto appella le attention verso
le necessitate de conquirer le citatanos pro le causa europee, per medio del
transformation del UE in un ver spatio de libertate, de democratia, de securitate e de
justitia. Pro tal, le PE accentua le necessitate de garantir le effective libere
circulation de personas in le interior del UE (de tote le personas, includente le
citatanos de altere paises legalmente entrate in le UE), assi como in le melioramento del
protection juridic del citatanos, per medio del recurso al Tribunal de Justitia Europee.
Parallelmente, le PE defende le reinfortiamento del
componente social del citatania europee: in ille senso, le PE considera esser
indispensabile garantir un nivello minime e commun de dispositiones relative al derecto
del travalio e al protection social, a fin de dar complimento integral al Charta del
Derectos Social de 1989 in le termino de cinque annos post le entrata in vigor del
Tractato de Amsterdam.
Finalmente, le relator propone le creation de un titulo
specific del Tractato super le “derectos del citatanos”, que stabilira le
collection del derectos que se extende al citatanos a causa del facto que illes pertine al
UE.
|
