Le Assemblea ha disveloppate un
ample debatto super le reforma del Politica Agricole Commun e le relative propositiones
contenite in le Agena 2000 elaborate per le Executivo. Al base del discussion cinque
reportos del commission de agricultura per le quales le votation ha essite totevia
postponite al session de Bruxelles de 28 de januario.Le
financiamento
Le commission de agricultura es favorabile al approche
adoptate per le Executivo in le nove regulamento relative al financiamento del Politica
Agricole Commun. Supertoto, pare coherente le option del Commission de non imponer un
total cambio al modello existente de financiamento, que se ha revelate efficiente e
efficace.
Le Executivo propone includer in le sectione de garantia
del FEOGA le intervention de disveloppamento rural visante a meliorar le modernization e
le diversification foras del programmas del objectivo 1; le specific mesuras veterinari
fixate per le Consilio; illes visante a fornir informationes dur le PAC e in fin le
actiones de restructuration del flotta de barcas de pesca non previste per le objectivos 1
e 2.
Le relator Jan Mulder (ELDR, NL) crede que
esserea necessari financiar per medio del section de garantia tamben le actiones visante
al melioramento del qualitate del productos agricole, alimentari e non, e le adjutas
pre-adhesion, como ja proponite per le Commission.
Quanto al section de orientation, le proposition del
Commission de includer le mesuras de disveloppamento rural previste in le quadro del
objectivo 1 e del initiativas communitari es securmente a approbar.
In le secunde parte le regulamento attacca le themas del
gestion, del controlo e del proceduras decisional relative al dispensas del FEOGA. Se
defini le criterios e le obligationes del organismos pagatori e le sanctiones pro eventual
deberes non-complite; le possibilitate de coperir le dispensa in base al anticipationes ja
assignate per le Commission; le competentias de controlo del Statos Membros e le normativa
relative al inspectiones in loco del Executivo.
In fin le Executivo propone le introduction del
co-financiamento, del parte del autoritates national, del mesuras de appoio al renta.
Secundo le commission de agricultura iste inclusion representa un modo pro reinfortiar le
subsidiaritate, proviste que se mantene conditiones acceptabile pro le productores e que
non se tracta de renationalizar celatemente le PAC.
Appoio al agricultores
Le proposition del Executivo visante a instaurar un nove
regime de appoio directe al agricultores ha essite approbate sin emendamentos per le
commission de agricultura. Le proposition intende reducer le systema de adjutas super le
base de un scala mobile digressive que prende in consideration le empleo del agricultores
e le imperativos ambiental. Le relator Friedrich-Wilhelm Graefe Zu Baring-dorf (Verdes,
D) habeva cercate de imponer un tecto al pagamento directe e de conditionar le pagamento
al respecto del normas ambiental mais le commission de agricultura ha preferite mantener
le texto original.
Carne bovin
Quanto al reforma del organization commun de mercato pro
le carne bovin le relator Georges Garot (PSE, F) ha indicate como prioritate le
melioramento del qualitate, a fin de restabilir le confidentia del consumitores mittite a
dur proba per le crise del "vacca folle"; le correction del disequilibrios de un
mercato que face registrar annualmente un augmento del production de 2% e un reduction del
consumption de 1%; le exigentia de conciliar le aspectos economic del production con los
de character social e ambiental. Tal prioritates non ha essite recipite per le Commission
que pare principalmente preoccupate de ampliar le mercato pro le carne europee in le
mercato mundial e de reducer le precios. Se pote acceptar assi un rationabile reduction
del precios, circa 15%, pro augmentar consumption e production; mais essera necessari
tamben mesuras compensative de accompaniamento.
Lacte
Un reduction de 17% del precio indicativo del lacte e de
15% del precio de intervention pro le butyro e le lacte in pulvere ha essite proponite per
le Executivo pro le mercato lactier-caseari que debe recuperar competitivitate in le
confrontos con altere productores mundial. Le commission de agricultura — relator Lutz
Goepel (PPE, D) — propone, in vice, respectivemente reductiones de precios de
12% e de 10% si permanera le prorogation usque le anno 2006 del regime del quotas.
Cereales
Le cereales constitue 11% del total del production
agricole communitari mais absorbe ben 40% del reservas destinate al budget del Union al
financiamento del PAC. In ultra le 40 milliardos de euros previste pro 1999 pro le PAC es
attribuite a un sector que occupa 7,5 milliones de personas, durante que le disoccupatos
europee, que es plus que le duplo, certo non gaude de un simile tractamento. Toto isto
— ha affirmate Giulio Fantuzzi (PSE) — ha devenite insustenibile e urge
correctiones, a comenciar per le reduction del precio de intervention que le Executivo
volerea fixar a 20%, durante que le commission de agricultura tende a 15%.
Es necessari ergo confrontar le problema del excedentias
que retorna a emerger: actualmente le surplus es de 20 milliones de tonnas. In comparation
a quanto proponite per le Executivo — ultra al emendamento del reduction del precio
— Fantuzzi ha demandate de excluder del premio unic le semioleosos, de non zerar le set-aside
intra le anno 2000, de reinfortiar le cohesion e le solidaritate e de recuperar le
confidentia del consumitor.
|
