Le eurodeputatos exige reformas interne in le Commision
Traducite de Tribuna del Parlamento Europeo per
Ensjo. |
Le Union ja ha un budget pro 1999. Le prime in euros de iste
legislatura. Tamben es le ultime del actual perspectivas financiari que expira al final
del anno. In le proxime menses se debe precisemente accordar le quadro financiari pro le
periodo 2000—2006. Illo es un budget rigorose. Tamben, responde al prioritates
politic del Parlamento Europee, concretemente empleo e politica social, le Europa del
cognoscentia, le medio-ambiente, e le complimento del obligationes exterior del Union. Le
relator pro le budget general del Union de 1999 ha essite le deputata socialista espaniol
Bárbara Dührkop. Le ammonta finalmente approbate per le Parlamento in su secunde
lectura es de quasi 97 milliardos de euros in compromissos pro le anno veniente. Le
Parlamento Europee ha volite respectar le rigor budgetari del Statos-Membros, limitates
per exigentias del pacto de stabilitate e illo se reflecte in que le total suppone 93,7%
del maximo autorizate de accordo con le quadro financiari actual. Isto significa que le
Union non attingera le tecto budgetari de 1,27% del PNB communitari.
Del total approbate, le principal partes es absorbite per le Politica Agrari Commun,
41,7% del total de compromissos, e le actiones structural, 40,3% del total. Le politicas
interne e le actiones exterior arriva cata un a circa 6%. Del actiones interne,
investigation es le activitate plus favorate, consumente quasi 59% de iste rubrica. Le
dispensas administrative representa 4,6% del budget.
Execution del budget de 1996
Durante que se approbava le budget pro 1999, ancora se debatteva le execution del
correspondente a 1996 del parte del Commission. Es function del Parlamento Europee, como
organo de controlo del dispensa communitari, approbar le gestion financiari e execution
budgetari del Commission, institution executive. In martio passate le Parlamento ha optate
pro retardar ille approbation a causa del irregularitates observate, que in alcun casos
poterea supponer fraude, per exemplo in le caso del programmas Med o del agentia pro
adjuta humanitari Echo. Le Parlamento ha exigite que le Commission prende mesuras: que
illo promove un bureau pro le lucta contra le fraude; que illo adopta un codice de
conducta pro functionarios de alte nivello; e que sia plus transparente con le Parlamento.
Le reaction del Commission ha essite qualificate como insufficiente e pro illo in le
session de decembre le Parlamento ha decidite non approbar ancora le gestion, a attender
un resposta plus satisfactori.
|
