Le Assemblea exprime satisfaction per le arresto del ex-dictator
chilen
Traducite de Europa Oggi per Ensjo. |
Post le arresto a London del ex-dictator chilen Pinochet sub
instantia del autoritates judiciari espaniol, le Camera ha approbate — con 184 si, 12
no e 14 abstentiones — un resolution in le qual se congratula per le efficace
collaboration anglo-espaniol que ha ducite al arresto de Pinochet e invita le governamento
espaniol a sollicitar, quando le judices lo demanda, le tempestive extradition del
mandante de tante assassinatos a fin que ille pote responder ante le tribunales espaniol
de tote le crimines que le es attribuite. In ultra, in reinfortiar su dedication a favor
del tutela del derectos human secundo principios de justitia universal e in conformitate
al tractatos international, le Parlamento exhorta le autoritates competente a applicar
los, prendente in consideration tamben le dispositiones contenite in le tractato super le
Union e in le actos normative del Consilio.
Le resolution ha essite illustrate per Manuel Medina Ortega (PSE, E), le qual
ha recordate le crimines committite per le dictator Pinochet, qui habe super le
conscientia milles de mortos inter le quales alcun decenas de citatanos espaniol. Un de
illes, Carmelo Sorio, habeva le unic torto de esser un functionario del Nationes Unite
inviate a Chile ubi ille ha essite arrestate, torturate e pois facite disparer. Pro le
cooperation judiciari in materia de extradition previdite per le Tractato de Amsterdam, le
autoritates britannic debera acceder al requesta del judices espaniol e permitter que
Pinochet sia finalmente processate per le crimines committite. A tal declaration se ha
associate Charles Goerens (ELDR, L), Alonso José Puerta (SUE/SNV, E), Wolfgang
Kreissl-Dörfer (Verdes, D) e Pierre Pradier (ARE, F).
Plus vage es le position assumite per Gerardo Galeote Quecedo (PPE, E) e James
Nicholson (I-EDN, RU), secundo le quales le justitia debe facer su curso sin
interferentias. Malgrado condemnante le regimes totalitari e rendente homage a tote le
victimas del intolerantia, in Chile e alterubi, Galeote ha exprimite plen appoio al
autoritates chilen e ha petite que sia respectate le traditiones democratic de cata pais
que interprende le passage de un regime democratic verso le democratia. Nicholson ha
sustenite que le crimines de Pinochet essera punite e que le decision es in le manos del
governamentos britannic e espaniol.
Pro le Executivo le commissario Franz Fischler ha exprimite le nette
opposition de Bruxelles contra tote dictatura, qualcunque sia su orientation politic, e ha
manifestate plen solidaritate a tote le victimas del regime de Pinochet. De altere parte
le Commission non habe competentia, super le base del tractatos, in le campo del
cooperation judiciari penal tanto plus que ambe le accordos approbate a nivello europee in
materia de extradition non ha essite ancora ratificate per tote le paises membros.
Al conclusion del debatto, le vice-presidente Renzo Imbeni (PSE, I), qui
conduceva le labores in le Camera, ha sublineate le importantia del facto que le Parlamento
Europee habeva reservate un hora de session a iste thema del actualitate.
|
