Preparar le citatanos pro le alterationes
monetari
Le PE, ingagiate, como sempre,
in le grande momentos del processo del
construction europee, non poterea
esser disattente al creation del moneta unic.
Pauc menses ante le reunion que decidera
qual paises va participar in le moneta unic,
le eurodeputatos debatteva questiones relative al
impacto del euro in le mercatos de capitales, al
aspectos externe del UEM, al euro e al consumitor
e al nove technicas e al moneta.
Traducite de Tribuna
da Europa per Ensjo.
|
Le
impacto del euro in le mercatos de capitales
Il ha consenso que le introduction del moneta unic
va affectar le mercatos de capitales. De facto,
le mercatos obligational national –
fragmentate e characterisate per volumines
de mercato relativemente diminute e,
consequentemente, per elevate costos de capital
pro le emittentes e per elevate costos de
transactiones pro le investitores – se
transformara in un unic grande
mercato obligationistic europee, le
qual, post le mercato obligationistic del
SUA, essera le secunde major del mundo! On
crede que le futur mercato obligationistic
va esser create sin major problemas, passante le
titulos del debita public a
esser emittite in euros, con le initio del 3ie
phase del UEM.
Del altere latere, le
integration total del mercatos de actiones e del
productos derivate – potentialmente le
tertie mercato a nivello mundial – non se
facera tanto rapidemente, a causa del
differentias que separa ancora le regimes
national in materia de contabilitate, de
fiscalitate o de transactiones in le bursa.
Antea, le UE debera tentar harmonisar le
quadro legislative in iste areas, a fin de levar
le barrieras legal e fiscal que falsa le
concurrentia (i.e. necessitate de harmonisation
del derecto del societates, de presentation de
contos, del regulamentos del bursas e del
adoption del statuto del societates europee).
Minus optimistic, Celeste Cardona
(UPE, P) affirmava que le euro non resolvera
tote le problemas del mercatos financiari, perque
il continuara a haber barrieras juridic
e fiscal e cata un del statos-membros continuara
a tentar capturar investimentos in function de
lor interesses.
Le aspectos externe del euro
Le introduction del moneta unic se
traducera per le creation del major
mercato unificate del mundo, con un grado de
apertura superior a los del SUA e de Japon.
Nonobstante, le position global del euro, como
moneta de transactiones international e como
moneta de reserva official, dependera, de
un latere, del orientation, fortia,
stabilitate, apertura e del volumine
associate de commercio global del economia
subjacente e, del altere latere,
del amplitude, profunditate e liquiditate del
mercatos de capitales indicate in euros que debera
esser disveloppate con le concretisation del
union monetari. Il es valide, nonobstante,
referer que, in le periodo immediatemente
posterior a su introduction, le euro potera
esser submittite a instabilitates de cambio,
debite al comportamento imprevisibile del
investitores institutional mundial.
Nonobstante, a longe termino, le taxa
de cambio del euro dependera de elementos
economic fundamental (crescimento,
inflation, saldos del balancia de pagamentos,
saldos del budgets public) e del
expectativas quanto al evolution de iste
elementos in le Union, ma anque in le altere
grande zonas monetari, e plus tosto del USD. Il
es, consequentemente, multo importante que le
taxa de cambio del euro in relation al USD e al
yen se mantene a un nivello correspondente a un
equilibrio fundamental a longe termino,
sin provocar effectos recessive (debite a un taxa
troppo alte) o effectos inflationistic
(debite a un taxa troppo basse). Como lo
affirmava Manuel Porto (PPE, P), il es necessari
que le euro se constitue como un moneta forte e
stabile, in un equilibrio correcte, que
evita le penalisation del exportationes del UE
(euro supervalutate), o le perdita de
credibilitate e le inevitabile
consequentias inflationistic (euro
subvalutate).
Consumitores non pote esser prejudicate
Le introduction del euro sera bastante
positive pro le consumitores, pensa le PE. De
facto, istes debera beneficiar, in
principio, del caditas de precios de benes e
servicios, debite a un intensification del
concurrentia provocate per le transparentia del
precios practicate in le varie statos-membros. On
pote citar como un exemplo le disparition del
riscos de cambios (anque interessante pro
viagiatores e touristas del UE). Del mesme modo,
on previde ancora le mantenimento del taxas de
interesse del prestos a un nivello basse (Vider
cassa Le euro e
le consumitor).
A fin de preparar le consumitores al
introduction del euro, essera necessari
prender un collection de mesuras que les
permittera stabilir contacto con le nove
moneta, que essera, durante le phase de
transition, le unitate de fixation del precios e
del rendimentos. Caute, Sérgio Ribeiro (SUE/SVN,
P) accentuava le facto que il non bastar approbar
resolutiones con le "pie intention" que
non le consumitores debe supportar le costos del
euro, on debe plus tosto acclarar como se evitara
que isto evenira, durante que Helena
Torres Marques (PSE, P) questionava al commission
si illo es preste a avantiar con campanias de
information del consumitores, de formation del
empleatos, de appoio a programmas del
scholas, del universitates, del organisationes
non governamental, specialmente illos ligate al feminas
(que es 70% del consumitores), pro ganiar le
confidentia del publico.
Le euro e le "moneta electronic"
Al fin, e in le ambito de le nove
technologias e le moneta, il es valide
referer que le periodo de transition al
moneta unic (1999–2000) essera
"perturbate" per le "Big
Bang" informatic que occurrera
con le passage del seculo. Tal
circumstantia consiliava le uso de prudentia
quanto al disveloppamento del moneta electronic
in le UE. In realitate, iste ultime
constitue non solo un transition a altere
systemas de pagamento, ma anque un redefinition
del ipse concepto de moneta, suscitante le
question de saper si su emission debera
esser integremente libere, limitate a
certe instructiones subjecte a regulamentation
del Banca Central, o attribuite
exclusivemente al ipse Bancas Central. Ergo, on
pensa opportun que le Consilio, eventualmente in
consultation con le Consilio de Europa, elabora
un studio super le securitate, le
protection de datos e le implicationes in materia
de libertates public resultante del
mercato de pagamentos electronic.
|
ARROTUNDAMENTOS.
Durante le periodo de
transition, on pone le question del
arrotundamentos, habente restate
stabilite que le euro non habera
plus que duo decimales (i.e., si le
resultato del conversion essera
10,228 euros, alora le valor a considerar
essera 10,23 euros). In le
conversion de euros a escudos, le
arrotundamento essera effectuate
al escudo inferior o superior (i.e., a
12.453$76, debe corresponder 12.454$00).
CARTA BANCARI. Durante
le periodo de transition, certe
distributores de moneta potera
affixar le amonta in euros e in escudos.
In le occasion de un pagamento per carta,
le cliente e le commerciante essera
debitate e creditate in le devisa del
respective contos.
CARTAS DE CREDITO.
Le consumitor continuara
a effectuar su compras como in le
passato, non importante si ille paga in
iste o in ille moneta, includente le
euro.
CONTOS BANCARI
E PAGAMENTOS. Durante le periodo
de transition, on potera effectuar
pagamentos in ambe devisas. Le
conversiones essera realisate
gratuitemente inter 01/01/1999 e
31/12/2001. Le contos bancari potera
esser convertite in euros in un sol vice
e sin qualcunque commission. In le caso
que on non ha sollicitate a su banchero
de facer le operation, le conversion
essera effectuate automaticamente in
31/12/2001.
CONTRACTOS IN
CURSO. Le introduction del euro
non altera del toto le contractos in
curso. Il se tracta de un del principios
fundamental del introduction del moneta unic:
tote le contractos in curso permanera
valide. Non importa si il se
tracta de un contracto de location, de un
contracto de travalio, de un contracto
bancari o de investimentos, le entrata in
vigor del euro non potera jammais
esser invocate pro rescinder o modificar
un contracto stabilite in devisas
national (salvo si un clausula special
del contracto previde le contrario).
MONETA LIQUIDE.
Le cambio de notas e de numismas
national per euros se facera sin
qualcunque formalitate administrative
supplementari al balcon de qualcunque
banca.
HYPOTHECAS,
PRESTOS E LOCATIONES DE CASA. Le
taxa de interesse fixate per contracto
non se altera. Nonobstante, le valor del
amonta prestate essera convertite
in euros. Le mesmo se passa in relation
al location de casa. Si, per exemplo, un
citatano paga un location de casa in
ordine de 50.000 escudos, con le
introduction del moneta unic ille
passara a pagar 250 euros.
CASSAS
ELECTRONIC. Le terminales essera
adaptate de maniera que illos potera
functionar o in euros o in le moneta
national. Le cartas bancari potera
esser convertite irreversibilemente in
euros. Le commerciante essera
creditate a base del devisa de su conto.
SPARNIO E
APPLICATIONES FINANCIARI. Le
introduction del euro non modificara
del toto le rendimentos del contos a termino
e del applicationes financiari. A partir
de 01/01/2002, al plus tarde, le
interesses e le capital essera
pagate in euros.
SALARIO O
PENSION. Le salarios e le
pensiones non debera suffrer
alterationes. Tal amontas es simplemente
convertite in euro, mantenente le mesme
valor de compra. Si, per exemplo, un
individuo gania actualmente 200.000
escudos liquide mensualmente, in
le futuro ille passara a ganiar
1.000 euros, in le hypothese de que 1
euro es equivalente a 200 escudos.
ASSECURANTIAS. Tote
le contractos redigite in escudos passara
a esser exprimite in euros. Le
conditiones fixate al occasion del
conclusion del contracto permanera
valide. Solmente un alteration: le
premios e le reimbursamentos essera,
a un certe momento, convertite a euros.
Tal occasion essera definite per
accordo inter le partes interessate.
|
Le marcha del euro
1. Qual es le 3 phases del UEM?
1me
PHASE (01/07/1990 – 01/01/1994).
Inglobava tote le collection de mesuras
preliminar al reformas, in particular le
liberalisation del movimentos de capitales.
2de
PHASE (01/01/1994). Consiste in le
coordination del politicas economic
a fin de preparar le Statos-Membros del UE pro:
- le Union Monetari;
- le creation del IME, que a termino
devenira le Banca Central Europee;
- le processo de independentia del Bancas
National;
- un vaste serie de harmonisationes.
3ie
PHASE (1998). Habera initio in un
momento ancora a decider per le chefs de stato e
de governamento, post analyse favorabile
per le Commission. A 01/01/1999, secundo le
Tractato, le euro entrara in vigor,
verificante se un conversion progressive del
operationes bancari, nonobstante que solo a
partir de 2002 le citatanos europee habera
le euro in lor tascas.
2. Statuto juridic del euro
A partir de 01/01/1999 le euro essera
le unic moneta official del paises
participante in le moneta unic. Le escudo
constituera un subdivision del euro. Non
essera plus possibile cambiar
directemente escudos per pesetas, per exemplo, on
debente converter, primo, escudos in euros e,
posteriormente, euros in pesetas.
Tote le contractos de longe duration,
commercial, industrial o financiari stabilite in
le regime del escudo essera convertite in
euros in le nove regime.
3. Que succedera post 01/01/1999?
Le mercatos interbancari, le mercatos
monetari, le mercatos de capitales essera
stabilite in euros. Le quotation del bursa essera
calculate in euros, tal como le ordines
del bursa que essera emittite, anque, in
euros. Le debitas del Statos-Membros essera
convertite e tote le nove emissiones de debita
public cessara esser effectutate in
escudos.
Il essera equalmente necessari crear le
legislation relative al introduction del moneta unic
pro le continuitate del contractos concludite in
escudos, sin oblidar definir e poner in practica
le politica monetari del euro que essera
conducite per le Banca Central Europee.
4. Quanto valera le euro?
Le taxa de conversion del escudo in euro debera
esser fixate de modo irreversibile, le
plus tarde usque 01/01/1999 (on parla anque de
31/12/1998). Le valor del euro essera le
del ecu. Le data e le methodo utilisate
ancora non ha essite fixate e non essera
rendite public a fin de evitar qualcunque
speculation. Il se tracta de un decision multo
importante perque le taxas de cambio
determinara le competitivitate del economia
europee. Nonobstante, on non debe excluder
le possibilitate de que se registrara
alicun perturbationes in le mercatos de cambio in
le dies precedente le data del prendita del
decision.
5. Que succedera inter 01/01/1999 e
01/01/2002?
Iste tres annos essera utilisate pro
adjutar tote le sectores economic a
effectuar su transition al moneta unic.
Observantia al regula No/No: No al
obligation e no al interdiction del utilisation
del euro! Cata europee essera libere
pro seliger le data del passage al euro.
6. Que succedera post 01/01/2002?
In iste ultime phase, on spectara
le introduction de numismas e notas in euro e le
retiro del monetas national. Tote le systemas de
pagamento del bancas oscillara circa le
euro, assi como tote le transactiones public
e private. Le numismas e le notas de cata
Stato-Membro que adherera al moneta unic
cessara haber curso legal. Iste phase
durara, al maximo, 6 menses.
Nonobstante, nihil impedi que illo essera
anticipate (on parla de 3 menses).
7. Qual es le avantages del euro?
Le euro debera contribuer a meliorar le
rendimento e le resultatos del interprisas, per
medio del:
- diminution del costos del operationes
financiari;
- melior functionamento del Mercato Unic;
- apertura de un zona multo ample pro le
capitales de investimento in Europa;
- disparition del riscos de cambio e,
consequentemente, creation de melior
opportunitates commercial.
Le euro passara a esser un concurrente
notabile del yen e del USD, ultra que illo
contribuera pro fixar Germania a Europa a
fin de evitar un guerra economic de
proportiones incognite.
Pro le consumitores il essera possibile
effectuar le comparation uniforme de precios in
qualcunque territorio del UE que habera
adoptate le moneta unic. Le euro visa
ancora un importante objectivo politic:
relancear le construction e le integration europee.
8. Qual es le inconvenientes?
Le passage al euro presenta enorme
complexitate quando on lo analysa in su toto.
Illo implica le transformation de tote le
programmas informatic in tote le sectores
del economia, apportante costos elevate.
Ora on comencia saper quanto on va guastar, ma on
ignora quanto on va ganiar.
Malgrado que on promitte un major crescimento
e plus de empleo con le euro, le adaptation potera
esser complexe, inclusivemente del puncto de
vista social. Ma, toto summate e calculate, le
euro debera contribuer a un Europa plus
forte e democratic.
|
