IN INTERLINGUA

Que es Interlingua?

Breve Vocabulario

Breve Grammatica

Union Mundial pro Interlingua

Traducite de EP News per Ensjo.

Illa presentava un pictura graphic del situation cruel in le provincia, ubi 400.000 habeva essite dislocate, 50.000 viveva al aperto e milles habeva essite occidite. Illa evocava imagines de “citates e villages vacue, frequentate per le lente phantasmas de feminas, infantes e ancianos currente ab casas destruite per le foco; villages integre ruinate e comburite”. Neonatos, secundo reportos, moriente per manco de alimento e de provisiones medic. “Durante que le politicheros del communitate international guasta un tempore preciose”, illa dice, “civiles innocente es massacrate”.

Le appoio al Exercito de Liberation de Kosovo ha crescite ab apena 200 a 300 defensores in februario usque a inter 30.000 e 50.000 actualmente como resultato de iste atrocitates. Le Occidente non apprendeva le lectiones de Bosnia e le situation se repeteva. Le perpretatores esseva le mesme, solo le victimas esseva differente. Illa esseva profundemente choccate per le attitude del communitate international verso le Presidente Slobodan Milosevic — “le Macello del Balkans” — e credeva que le Occidente peteva que le victimas negotiava con le perpretatores pro obtiner un “stabilitate basate super crimines de guerra e morte”.

Illa voleva que le communitate international exigeva que le governamento de Milosevic cessava immediatemente tote operationes militar in Kosovo e se retirava del provincia. Illa requireva que tote le responsabiles pro atrocitates contra le derectos human esseva apportate ante le Tribunal pro Crimines de Guerra e que libertate irrestricte de movimento in Kosovo esseva concedite a organizationes humanitari. Le visita de seniora Jagger sequeva le debatto del Parlamento super le situation quando Benita Ferrero-Waldner, le ministro austriac pro affaires europee, in nomine del Consilio, condemnava le responsa yugoslave al crise como “excessive e impardonabile”.

Illa credeva que il non poterea haber vincitores in terminos militar e que il deberea haber un solution politic basate sur un fin del offensiva serve, un melioramento decisive del situation humanitari e le initio de negotiationes rationabile. Como parte de su responsa al situation, illa diceva, investimentos e contos bancari yugoslave in le UE habeva essite congelate e volos a Yugoslavia desde le UE habeva essite banite. Illa allertava que un intervention militar esseva improbabile, totevia, perque illo demandarea accordo del NU. Le Commissario Hans Van Den Broek, totevia, non discartava iste option, perque ille credeva que illo esseva le unic maniera de approximar le differente factiones politic.

Ille argueva que le experientia de Bosnia monstrava que solo un attitude firme poterea producer resultatos. Deputatos echoava iste anxietates e demandava un responsa robuste del UE al crise. Totevia, illes esseva dividite super si le intervention militar esseva un responsa appropriate, con le socialistas opponente iste option. Iste division esseva notate quando le Camara non succedeva accordar quanto a un resolution requirente action del UE, essente incapace de accordar super le appoio al uso de fortia.