| Post audir le Presidente del Consilio Douglas Henderson
expressar su exasperation contra le fallimento del UE sub le presidentia Britannic in
facer progressos in dialogos con Israel super le implementation del accordo "terra
pro pace" de Oslo, deputatos demandava un nove initiativa pro rumper le impasses.
Isto se basarea in persuader Israel a retirar se del territorios occupate a fin que se
pote facer progressos in le questiones connexe de definition de frontiera e le stato de
Jerusalem e Palestina. Le deputatos cerca un involvimento plus active del UE in adjutar
le autoritates palestin a prender mesuras effective pro combatter le terrorismo. Le
deputatos audiva le Commissario Manuel Marin recognoscer que erruptiones de violentia e le
attitudes de linea-dur del governamento Netanyahu per le 18 menses passate ha ducite le
programma assistential del UE a un chaos.
Un nove aeroporto construite con 15 milliones de ecus del programma assistential del UE
non poteva operar perque illo non recipeva permission de apertura del autoritates
israelita. "Le ultime 18 meses esseva un inferno", commentava le Commissario
Marin. Mary Banotti (Irl, PPE) informava que un nove hospital, de novo con assistentia
financiari del UE, tamben remaneva claudite perque il ha fundos insufficiente pro pagar le
custos operational e le doctores, malgrado le necessitate desperate de installationes
sanitari.
Un reporto special redigite per deputatos investigante le administration del programma
assistential del UE de 750 milliones de ecus revela controlo insatisfactori del despesas,
pro non mentionar inconsistentias gerential del parte del autoritates palestin e forte
suspiciones de fraude.
Le Commission tamben non escappava del criticas. John Tomlinson (RU, PSE) reclamava
contra reportage inadequate al Parlamento e un attitude defensive e evasive del parte de
un official de Commission.
Deputatos vole vider controlos multo plus stricte e plus de transparentia in le
gerentia de futur programmas assistential. Illes appoia fortemente le continuation del
assistentia europee al palestinos pro meliorar le functionamento del nove unitate
administrative in le territorio.
Illes tamben es anxie pro vider routes de transito aperte pro render possibile le
movimento de personas e benes inter Gaza e le Ripa Occidental. James Provan (PPE, RU)
incitava le disveloppamento de un fronte unite del UE in cooperation con paises arabe
vicin como un maniera de cercar un via de exito pro le impasse.
|
