| Le presidentia
britannic ha essite marcate per duo eventos
historic: le lanceamento del moneta unic e le
processo de allargamento del Union. Quanto al
prime puncto le prime-ministro britannic Tony
Blair, in su veste de presidente del
Consilio Europee, ha sublineate le necessitate de
un Banca Central Europee credibile e de reformas
economic sustenibile que permitte un ver
functionamento del UEM. Le Summitate de Cardiff
— ha recordate Blair — ha permittite
identificar le punctos essential del reforma
economic: lucta contra le disoccupation,
dedication pro reformar le politicas
macroeconomic, consolidation del mercato unic,
adjuta al parve e medie interprisas. Quanto al
processo de allargamento le Prime Ministro
britannic ha sublineate que le negotiationes ha
essite aperte con sex paises: 7 capitulos del 31
previste ha ja essite completate. Le proxime
étape essera le apertura del negotiationes
official. Ma le successo del allargamento depende
tamben del revision del politicas interne del
Union mesme. Accumulation e distribution del
balancio, reforma del Fundos structural e
modernization del PAC son le principal aspectos
del reforma. Quanto al politica del balancio
Blair ha evidentiate le necessitate de trovar un
solution rapide e satisfactori al problema del
dispensas del Commission disproviste de base
juridic.
Le principal themas del politica externe ha
essite confrontate — secundo le Prime
Ministro britannic — in maniera a
disveloppar un plus coherente e potente presentia
europee. Le crise in Kosovo ha trovate prompte
responsa, e le possibile intervention militar
prospectate in le ambito del OTAN incontrara le
plen appoio del statos membros, si le diplomatia
sol se revelara impotente. Quanto al situation in
le Medie Oriente le Union appoia le effortios del
Statos Unite, ma se ha disignate un rolo specific
del Union mesme pro le disveloppamento del
processo de pace.
Blair ha al fin recordate le progressos
realizate in materia de protection del ambiente,
de lucta al criminalitate e de apertura e
transparentia del processo decisori. Pro le
futuro — ille ha concludite — il es
necessari un Europa competitive e dynamic, ligate
a un modello social que ha essite reformate.
Equalmente ha essite effectuate reformas politic
que garante le identitate national in le ambito
de un vision europee e que permitte finalmente
crear un ver ligamine inter le citatanos e le
institutiones a nivello national e europee.
Le Consilio Europee ha essite protagonista de
disveloppamentos historic in iste ultime menses e
le Chefs de Stato e de Governamento ha potite dar
vita a un ver debatto super le futuro de Europa.
Iste es le evalutation del presidente del
Commission Jacques Santer que ha passate
in revista le principal themas tractate a
Cardiff.
Quanto al reforma economic ille ha recordate
que il es tempore de passar del dimension del
euphoria general e del declarationes enthusiastic
via a un ver exercitio de coordination politic,
si se vole facer del euro un successo durabile.
Al termino del debatto le Assemblea ha
approbate un resolution in le qual illo ha
sustenite e ampliate le mesuras de un reforma del
politica economic e in favor del occupation,
sollicitante le rapide completamento del
proceduras legislative super tote le aspectos del
Agenda 2000.
Le Camera invita le Executivo a proponer un
directiva super le integration del ambiente e del
sustenibilitate in le varie politicas
communitari, assi como super le tutela del
consumitores, petente in ultra al Consilio e al
Statos Membros de dedicar se al le creation de um
tribunal penal international credibile, efficace
e independente.
Le Parlamento Europee ha condividite le
position exprimite per le Consilio super le crise
in Kosovo, declarante se complacite per le
effortios complite per le Presidentia britannic,
assi como per le UE e per le Statos Unite, in le
Medie Oriente pro cercar un composition al
problema inter Israel e Palestina.
Al fin le Assemblea sustene le projecto de
reforma del institutiones communitari,
indispensabile in vista del futur ampliamento del
Union.
|
