| Deputatos approbava
iste mense un legislation elaborate pro assecurar
le protection legal de nove inventiones
involvente le disveloppamento de biotechnologia e
de genes, sub vocifere opposition del Verdes qui
argueva que il habeva controlos ethic
insufficiente pro evitar abusos. Un tentativa
anterior de approbar un legislation similar,
considerate vital pro salvaguardar le emergente
industria biotechnologic europee, esseva
frustrate in 1995 quando deputatos credeva que le
lege poterea permitter le patentamento de
embryones human e altere practicas inacceptabile.
Iste vice, totevia, le Consilio acceptava le
phraseologia plus stricte desirate per le
Parlamento e le legislation ora exclude
qualcunque patentamento de partes del corpore
human, ben que nove discopertas basate super le
tractamento de genes debile o defective pro
propositos medic pote esser patentate.
Iste vice le deputatos esseva convicte del
beneficios que nove avantiamentos medic pro
attaccar infirmitates como le maladia de
Alzheimer, cancere e leucemia pote apportar.
Christine Oddy (PSE, RU) sentiva que
iste vice se ha attingite le balanciamento
correcte inter tener a aspectos ethic e permitter
que le industria pharmaceutic prospera.
Le legislation exclude qualcunque uso de
embryones human pro propositos industrial o
commercial. Es includite in le legislation
provisiones pro le stabilimento de un gruppo de
labor independente concernente le ethica, que
monitorarea attentemente le observantia del
legislation e se reportarea quando necessari al
deputatos. Winnie Ewing (ARE, RU) esseva
un del deputatos qui non poterea acceptar un
legislation que permitterea qualcunque forma de
manipulation indebite del corpore human. Illa
diceva: "Illo degrada le currente del
humanitate."
Ma Willi Rothley (PSE, D), qui ha
tentate componer un compromisso convenibile
acceptabile per totes, expressava su satisfaction
con le resultato final. "Le Parlamento
Europee pote sentir que su rolo como
co-legislator ha essite satisfacite", ille
diceva.
Un puncto in question esseva le aspecto del
legislation que ha permittite que on obtene
patentes super nove sortas de granos
geneticamente manipulate. Alcun deputatos argueva
fortemente a favor del "privilegio del
fermeros", o le idea que fermeros poterea
esser exempte de pagar derectos de autor pro usar
tal nove productos, ma isto non esseva adoptate.
Deputatos tamben indorsava un proposition pro
provider le etiquettage compulsori de alimentos
facite de organismos geneticamente manipulate
(OGMs). Un problema es decider quanto a un
procedura pro tractar de soja e mais
geneticamente manipulate ma non continente
materiales de OGMs post processamento e, como
tal, alora identic in apparentia e sapor al
producto conventional. Le Assemblea approbava un
emendamento exemptante tal productos del
obligation de etiquettage.
|
