Aperte le debatto sur le relationes inter le futur Banca Central
Europee e le Parlamento
Traducite de Europa Oggi per
Ingvar Stenström. |
In le approbation de un reporto de su commission economic, le
Assemblea sublinea que le Tractato del Union (articulo 105) sanctiona que le objectivo
principal del Banca Central Europee (BCE) debera esser le mantenimento del stabilitate del
precios e que le independentia del BCE pro isto constitue le melior presupposition. Le
independentia del futur BCE — observava le reportante Christa Randzio-Plath (PSE,
D) — superara illo de qualcunque altere banca central e iste elevate nivello de
independentia sin precedentias requirera un grado de responsabilitate democratic anque
tanto elevate proque, pro esser credibile e durabilemente acceptate, le independentia
effective require legitimation e transparentia. Il debera dunque esser organisate un
dialogo inter le Parlamento Europee e le futur BCE sur problemas economic e monetari,
quadro que deberea esser confirmate per medio de un accordo formal.
Le oratrice ha sollicitate in ultra le futur BCE a acclarar le definitiones e su uso de
objectivos operative pro attinger illo del stabilitate del precios; besoniara pois
garantir le transparentia del grande decisiones concernente le politica monetari a fin de
prevenir un carentia de informationes e expectationes deceptive de mercato e contribuer
ergo a combatter le speculation e le equivocos.
In manifestar appoio al reporto, Gianfranco Dell'Alba (ARE, I) ha illustrate
le emendamentos presentate per su gruppo e relative al dialogo inter le Parlamento e le
Director del Banca Central Europee. Il se tractarea de previder le incontros inter iste
ultimo e le Assemblea con frequentia mensual a fin que le parlamento pote functionar como
cassa de resonantia popular del activitate del Banca. In ultra Dell'Alba ha requirite que
le director designate se pronuncia sur le reporto Randzio-Plath.
Del grado de fiducia que le BCE sapera conquestar in le mercatos dependera in bon parte
anque le possibilitate de reducer le taxas de interesse, un action tal que — secundo Antonio
Trizza (NI, I) — implicarea caditas favorabile como nunquam antea pro le parve e
medie interprisas.
Le porta-voce de Alliantia National ha postea sollicitate le futur direction del BCE a
dar probas de maxime impartialitate in le elaboration del politica monetari, e isto verso
tote le statos membros del Union; al enorme independentia debera functionar como
contrapeso un serie de mecanismos de consultation del Parlamento Europee, le unic
organisation del Union eligite democraticamente.
Recognoscente in le independentia del BCE un garantia preciose pro le UEM, Carlo
Secchi (PPE, I) ha insistite que le possibilitate de controlo darea credibilitate e
durabilitate al banca mesme. Totevia il non essera necessari recurrer a regulas rigide, ma
essera sufficiente stabilir comportamentos apte a crear un climate de fiducia inter le
Banca e le Parlamento Europee.
|
