Traducite de Tribuna da Europa per Ensjo. |
PMIs. Conscie que le parve e medie interprisas
constitue le ver motor del creation de empleo, le PE approbava un programma de assistentia
financiari al PMIs innovative e creative de empleo. Iste mechanismo se insere in le ambito
del initiativa in favor del crescimento e del empleo, al qual le deputatos consacrava 150
milliones de ecus. Le deputatos pretende facer le distribution del fundos per tres
mechanismos complementari: un fundo de capital de risco, gerite per le Fundo Europee de
Investimento in cooperation con le BEI e que visa le investimentos de risco le plus
elevate; un systema de contributiones financiari de appoio al creation del
partenariatos transnational de interprisas PMI, le "Joint European Venture",
gerite per le Commission; e un mechanismo de garantia PMI, gerite per le FEI, que attribue
special attention al prestos pro acquisition de activos immaterial. Le deputatos insiste
que un parte del programma deberea esser destinate al financiamento de PMIs cuje
activitate non es lucrative, con prioritate pro le interprisas con minus que cento
travaliatores. BIBITAS ALCOHOLIC. Le legislation communitari relative al
approximation del legislationes del statos-membros concernente le etiquettage,
presentation e publicitate del productos alimentari previde le indication del ingredientes
que entra in le composition del productos alimentari, ma non in le del bibitas alcoholic.
Attente que, in le ultime annos, ha essite ponite in le mercato sempre plus bibitas
alcoholic cuje composition e presentation revela que illos ha essite disveloppate pro
esser vendite al juvenes, le PE prendeva position in favor del adoption de dispositiones
commun relative al etiquettage del bibitas alcoholic, a fin de prestar le information
adequate al consumitores.
"FREE-SHOP". Preoccupate con le consequentias economic e social del
suppression del venditas con exemption de impostos ("free-shop"), le deputatos
approbava un resolution in le qual illes sollicita que le Commission realiza con maxime
urgentia, usque le 30 de septembre de 1998, un studio independente super le consequentias
social, economic, regional e a nivello de empleo del abolition del venditas con exemption
de impostos in le UE. Pro le autores del proposition, iste studio es essential pro
disponer de un imagine plus clar del situation. Rememora que le abolition del
"free-shops" in le commercio intracommunitari es previdite pro entrar in vigor a
partir del 1 de julio de 1999.
|
