Taxas de
aeroportos plus transparente e plus basse
contribuera pro le disveloppamento del transporto
aeree in Europa.
Traducite de Tribuna
da Europa per Ensjo.
|
Le PE vole reducer le taxas que
le aeroportos leva al companias aeree in cambio
del servicios e infrastructuras que illos pone al
disposition de aviones, cargo e passageros. Ille
taxas aeroportuari es normalmente fixate per le
autoritates national, differente bastante inter
statos-membros o mesmo inter le aeroportos de un
mesmo stato-membro. In media, in Europa, le taxas
representa 4 a 8% del costos operational del
interprisas europee de transporto aeree (10% in alcun
casos), durante que in le SUA illos non passa de
2%. Le analyse del systemas de taxas aeroportuari
existente in le UE revela que, frequentemente,
illos non reflecte le costos real del fornimento
de installationes e servicios aeroportuari al
usatores e illos es pauco transparente,
originante frequentemente un tractamento
differente del volos national e international,
includente le volos intracommunitari.
Pro garantir un
concurrentia libere e equalitari in le mercato
unic europee del transportos aeree, il es
essential que le interprisas de transporto aeree pote
operar in conditiones de mercato aperte e
transparente, lo que implica, a saper, que non
debera exister qualcunque discrimination inter
servicios aeree intracommunitari e que le precio
pagate per le usatores debera esser fixate
attendente al costo del installationes utilizate
o del servicios prestate.
Es in iste senso que va
un proposition del Commission in iste dominio
approbate per le PE a Strasbourg, le qual se basa
super tres principios: relation con le costos (le
nivello actual del taxas aeroportuari es, in le
intender del Commission, extrememente elevate in
comparation con le presente costos del
installationes e del servicios); transparentia
(le actual systemas es troppo technic e complexe
e le usatores non es informate super le
investimentos futur del aeroporto e respective
consequentias pro le nivello del taxas); e
non-discrimination (le taxas varia inter 30% a
90% pro le volos domestic e pro le volos
intracommunitari, le quales es considerate volos
international).
Sia emphatizate que le
objectivo non es harmonizar le taxas portuari, ma
plus tosto reducer le differentias inter le
systemas del taxas, assecurante taxas tanto
reducite quanto possibile, per medio de un
systema transparente, assentite in le
consultationes inter le aeroportos e le usatores.
Le PE approbava alcun
alterationes al directiva, accentuante illos que
permitte le mantenimento del systemas unic de
gestion del retes aeroportuari national, que
existe in alcun paises, a fin de adjutar le
aeroportos peripheric a coperir su costos e
promover assi le cohesion economic e social del
pais.
Rememora, al fin, que
qui al final paga le costos plus o minus elevate
del taxas es le passageros, viste que,
obviemente, le companias aeree los incorpora in
le precio de su billets. Considerante le
progressive augmento del concurrentia in le
sector, il es facile comprender le importantia
del presente proposition de legislation.
|
