Traducite de EP News
per Stan Mulaik.
|
Europarlamentarios
iste mense faceva appellos al communitate
international pro inviar un fortia multinational
a Kosovo pro stoppar un continuation del
violentia. Le idea es que le fortia esserea
montate per organizationes international
includente le Nationes Unite, le Union Europee, e
le Union Europee del West. Europarlamentarios
esseva horrificate per le carnage, e le action
del policia serbe esseva subjecte a extreme
critica. Le Commission e le Consilio esseva
severemente criticate pro un lente responsa a un
situation que multe membros opinava que poterea
esser predicite ante multe tempore. Le UE non
mesmo habeva un emissario in le region, plangeva
Johannes Swoboda (A, PSE) in contrasto al Statos
Unite que laborava activemente a disactivar le
micca de un crise explosive. Le Presidente in
chef del Consilio, Douglas Henderson, diceva,
nonobstante, que le Ministro britannic Tony Lloyd
jam visita le region e que le ministro estranier
Robin Cook habeva informate le Presidente
Milosevic del anxietate del Union Europee, mais
infortunatemente le Presidente yugoslave habeva
essayate a presentar le action del serbos como un
responsa legitime del policia al terrorismo. Sr.
Henderson emphatizava que le UE non appoiava le
independentia de Kosovo, mais in loco, autonomia
regional. Infortunatemente, le recente imposition
de fortia per le policia serbe ha minate le
moderatos de ambe factiones. Ministros estranier
del UE jam ha producite un declaration appellante
a ambe factiones pro negotiar un accordo pacific
in le disputa e que si il es necesse, illes
producerea altere mesuras si isto non occurre.
Le Gruppo de Contacto del sex nationes
componite de Britannia, le Statos Unite, Russia,
Francia, Germania e Italia que coordina le
responsa del communitate international, ha
approbate un plano de action de dece punctos,
includente un interdiction mundial del vendita
del armas a Yugoslavia, un refusa a provider le
equipamento que pote esser usate contra le populo
e le gelar del excambios commercial e del
creditos del investimento.
Le Presidente Milosevic ha recipite un
ultimato pro remover le fortias paramilitar de
Kosovo e entrar in dialogo con le communitate de
Kosovo. Si ille falle in facer lo, le Gruppo de
Contacto, que va reunir se de novo al 25 de
martio, va introducer altere mesuras, includente
un gelar del fundos del governamento de
Yugoslavia tenite al estraniero.
Le Leader del Gruppo Liberal, Gijs de Vries
(NL, ELDR), tamen appellava a action plus forte,
arguente que le Presidente Milosevic solmente ha
respondite al menacia de fortia e que un responsa
militar esseva necesse. Ille ha scribite al
ministro estranier de Britannia Robin Cook,
indicante que in 1989 le derectos constitutional
del majoritate albanese in le provincia esseva
abolite per le Governamento de Yugoslavia e que
desde alora il ha habite un continue crescimento
in le denegation de derectos al grande parte del
population.
Un appello facite in 1996 pro que le Consilio
organisava un conferentia international super
Kosovo esseva ignorate. Europarlamentarios esseva
anxie que le conflicto extenderea se e affectarea
le paises vicin in le Balkanes.
Il es pro iste ration que illes vole que le
Nationes Unite mantene un presentia militar in le
previe republica de Yugoslavia de Macedonia. Le
Parlamento anque vole que le autoritates
yugoslave permitte que le organizationes de
adjuta e observatores international vade a locos
ubi le violentia ha occurrite pro facer un
complete investigation, que pote ducer a un
action ante le Tribunal Penal International in
Haga.
Le violentia emergente in Kosovo sequente del
guerra civil e le atrocitates in Bosnia ha ducite
europarlamentarios a appellar pro un crescimento
substantial del poteres del Tribunal Penal
International. Le Parlamento vole que le
accusator es capace de initiar investigationes
con accesso a testes sin interferentia.
|
