Tribuna de Europa in Interlingua

IN INTERLINGUA

`F E B R U A R I O , 1 9 9 8`
Le crise in Irak: PE privilegia solution diplomatic
Traducite de Tribuna da Europa* per Ensjo.*	Le PE crede que on debe exhaurer tote le medios politic e diplomatic pro obligar Irak a complir le resolutiones del Consilio de Securitate del ONU. Solmente si le via diplomatic non producera resultatos positive on debera considerar le recurso a altere medios de pression super Bagdad, considera le deputatos. E solmente per medio de un previe decision formal del Consilio de Securitate. Le deputatos non ha dubitas quanto al necessitate absolute de obligar le regime de Saddam Hussein a complir le resolutiones del Consilio de Securitate, per finir le obstruction al travalio del inspectores del ONU. Nonobstante, illes pensa que on debe facer tote le possibile pro evitar le recurso al fortia militar, que poterea provocar multe victimas e grave damnos al population civil innocente. Ergo, le PE appella al Consilio pro disveloppar un politica commun tendente a exercer un pression diplomatic reinfortiate super Irak, a fin de evitar le necessitate de recurrer a un action militar contra ille pais, secundo un resolution approbate le passate die 19 de februario a Strasbourg. Si le pressiones diplomatic e politic se revelara inefficace, le deputatos considera que il essera necessari recurrer a altere medios de pression super Irak, ma sempre sub condition de un decision formal del Consilio de Securitate in iste senso. Parallelmente, le PE appoia le decision de augmentar le adjuta humanitari al population civil de Irak, specialmente in lo que se refere a alimentos e medicamentos, per medio del incremento immediate del programma "petroleo in excambio pro alimentos" proponite per le Secretario-General del ONU. Secundo le datos disponibile in le momento que nos conclude nostre edition, il pare exister rationes pro sperar que le votos del deputatos potera esser complite.

Initio · Alto