Traducite de EP News
per Stan Mulaik
|
Cercante disveloppar
controlos effective super illes qui proba entrar
in le frontieras del Union Europee,
particularmente in cerca de asylo, un acto
provisiori del Consilio es proponite pro establir
un systema computatorizate que dara al
autoritates de immigration le capacitate de
recognoscer le impressiones digital de illes qui
sollicita asylo. Le nove systema, cognoscite
como Eurodac, involvera
le creation de un base de datos central de
impressiones digital al qual le autoritates de
immigration pote haber accesso. Le
europarlamentarios discuteva le question iste
mense in Strasbourg, le debatto veniente in un
momento opportun proque in le mesme septimana le
parlamentarios anque ha prendite sub
consideration le question del refugiatos curde
veniente al Union Europee.
Le orator principal, Hedy d'Ancona (NL,
PSE), esseva generalmente favorabile al
propositiones proque illa credeva que illos
adjutarea a complir un harmonization del
politicas de immigration del statos
membros. Nonobstante, illa esseva anxie a
assecurar que le questiones de libertates civil
levate in le debattos esseva discutite
appropriatemente e que il habeva un structura politic
adequate pro le nove systema, que non debe esser
reguardate simplemente como un maniera de
excluder refugiatos genuin.
Plure altere parlamentarios echoava le
timores de Sra. d'Ancona in le debatto. Illes
esseva anxie que le systema poteva facilitar le
creation de un "Fortalessa Europa" que
excluderea ver refugiatos.
Multes demandava salveguardas adequate pro
proteger le datos que esseva mantenite tal que
illos non veni a manos improprie.
Commissario Anita Gradin emphatizava
le beneficios del schema, arguente in particular
que le nove systema facerea possibile
determinar si o non sollicitationes de asylo
esseva facite in plure locos per le mesme
persona.
Sequente le debatto, parlamentarios dava un
benvenita qualificate al propositiones, con
emendamentos designate a assecurar salveguardas
appropriate.
|
