Parlamento Europee
lauda action del autoritates italian e demanda
plus de solidaritate al Statos membros
Centos de refugiatos curde se
dirige clandestinmente al costas del Union Europee.
Intertanto, in le terra promittite, le gestion
del situation deveni plus e plus difficile.
Attente, le Parlamento Europee prendeva
position, demandante un solution politic
pro le problema curde. Intertanto, le deputatos
non sparnia laudes al autoritates italian, pro le
forma correcte e humanitari como illos ha
tractate del refugiatos curde.
Traducite de Tribuna
de Europa per Ensjo.
|
Illes arriva a
Europa via Italia e Grecia, fugiente del
repression politic o simplemente in cerca
de melior conditiones economic. Illes es
curdos e paga a trafficatores pro interprender
periculose viages verso un promittite Union Europee.
Le deputatos sape que le affluxo de refugiatos
curde, como le question del immigration
clandestin in general, solo pote esser cessate si
le problemas que reside in su origine
essera resolvite. Ergo, le resolution
que le Parlamento Europee approvava
demanda al statos membros que illes adopta un politica
externe commun que responde al defia
ponite per le repression del populo curde
e al consequente migrationes, prendente un
initiativa international que pone fin al
operationes militar turc in le nord de Iraq, assi
como al conflictos in le sud de Turchia.
Ma le deputatos sape que le crise curde se
revesti anque de un dimension criminose: le traffico
de refugiatos curde realisate per gruppos
international que collige lucros al costo del
suffrentia human. A causa de isto le resolution
approvate per le Parlamento Europee
exhorta le statos membros a interprender un
action specific e coordinate per le policia
international, con eventual auxilio del Europol,
a fin de restringer le traffico de esseres
human.
Le Parlamento Europee considera anque
que iste situation demonstra le necessitate del
definition de un politica commun de asylo,
de visas e de immigration que permittera
resolver le problema del immigration clandestin e
le menacia que isto representa al abolition del
frontieras interne de Union Europee. Del altere
latere le Parlamento Europee accentua
anque le necessitate del statos membros de
proceder a un repartition juste del oneres
que representa iste influxos de personas con
necessitate de protection, considerante que il se
tracta de un problema commun a tote le Union
Europee, e non de un problema specific
de un o altere stato membro geograficamente plus
exponite a iste typo de problemas.
|
