| Le completion del
union economic e monetari (UEM) e le
apertura del negotiationes con le paises
candidate a entrar in le Union Europee son
le cargas prioritari que se impone le presidentia
britannic, como ha annunciate al Assemblea
le ministro del exterior anglese Robin Cook
in su nove veste de presidente del Consilio del
Ministros del Union. Malgrado que le governo
Blair ha decidite non adherir per ora al zona
Euro — continuava Cook — le Regno Unite
facera tote le possibile a fin de
que le UEM sia coronate de successo perque isto
es in le interesse de tote le paises europee. In
le thema del allargamento, le orator ha
confirmate que le 12 de martio proxime sera
aperite officialmente a London le negotiationes
con tote le paises candidate e in ille
occasion sera ja accostate themas
concrete. Ille ha expressate satisfaction per le
decision del communitate turco-cypriota de entrar
a facer parte del delegation de Cypro e ha
expressate su desiro que sia restabilite
le discurso del adhesion con Turchia, pais
partenario e alliate del Union.
Cook ha alora sublineate le necessitate de
reapproximar le citatanos al ideal europee
agente in tres sectores particularmente sufferite
como le disoccupation, le criminalitate e le
ambiente.
Plus que 18 milliones de disoccupatos, ultra 5
del quales con minus que 25 annos, constitue un
perdita inacceptabile pro Europa anque del puncto
de vista mermente economic. Sera
necessari dunque combatter le phenomeno
dante possibilitates concrete de nove travalio,
favoriente le flexibilitate e le adaptabilitate
al exigentias de mercato, respectante le
equalitate de opportunitates pro tote le
interessatos. In tal contexto sera
applicate le plus tosto e in modo global le regulas
del mercato interne, simplificate le legislation,
eliminate le obstaculos non tarifari e promovite
le societate del information.
Pro combatter le criminalitate organizate e le
traffico de droga, que con un giro de
affaires circa 400 milliardos de dollares
es inferior solo al del petroleo, se debera
refortiar le cooperation international, per
exemplo rendente tosto operative le Europol,
intensificar le uso del nove technologias
— ja amplemente disfructate per le
criminales — e adjutar le paises asiatic
que cultiva drogas a cambiar le production
criminose per alteres legal.
In materia de ambiente se debera batter
le strata del disveloppamento sustenibile
e mitter le technologia al centro de tote
le politicas communitari, a comenciar per
le politica del transportos que presenta
excessive nivellos de pollution. In thema de
reformas del politicas communitari (Agenda
2000) Cook ha insistite super le urgentia
de crear un nove politica agricole
commun e de revider le fundos regional pro dar
major adjuta al zonas plus carente.
In fin, accostante le crise argelin, Cook ha
annunciate le decision de inviar a Algeria le
troika del Union pro apportar le appoio de Europa
al population victima del barbaritate e
pro offerer adjuta al autoritates in le cerca de
un solution al tragedia.
Claudio Azzolini (UPE/I) ha exprimite
appreciation pro le prioritates indicate per le
presidente Cook e ha accentuate le urgentia de un
reforma del fundos structural, utile
instrumento pro combatter le disoccupation,
evitante solutiones demagogic e faciente
in vice recurso al san pragmatismo britannic,
tanto plus ora que le Regno Unite sembla haber
imbraciate definitivemente le ideal europeistic.
Debera alora esser ducite avante le
disregulamentation del mercato e le
simplification del normas communitari que
frequentemente constitue un embarasso pro le
citatano e pro le interprisas. Azzolini ha in fin
expressate su desidero que le Union assume le
rolo que le compete super le scena mundial; in
particular sera necessari un serie politica
mediterranee con le proposito de render plus stabile
le region.
Cristiana Muscardini (NI/I) spera que
le presidentia britannic disveloppa un
rolo constructive in le Union, dismentiente
comportamentos anti-europeistic del quales in
precedentia le Regno Unite ha date prova. Le
oratrice se ha dicite de accordo con le
prioritates exponite per Cook e ha accentuate duo
preoccupationes major: ante toto, occurre que le
reforma del PAC non penalisa regiones del qual
proveni productos de alte qualitate; in ultra le
reforma del fundo structural non debera
compromitter le disveloppamento de regiones ja debile.
Post haber deplorate le troppo parve spatio
date per Cook in su discurso al problema droga, Gianfranco
Dell'Alba (ARE/I) se ha felicitate con le
governo britannic per le position assumite
in le sino del Nationes Unite super le Corte
penal permanente, thema que sera accostate
in junio in un Conferentia diplomatic que
se realisara in Roma. Le Regno Unite, unic
inter le membros del Consilio de
Securitate, se ha de facto clarmente pronunciate
pro le creation de un Corte impartial e non
subjecte al vetos del mesme Consilio.
Luciano Vecchi (PSE/I) ha affirmate que
le presidentia anglese debera occupar se
del definition del mandato del Commission super
le futuro del relationes con le paises de Africa,
Caribe e Pacifico (ACP) e del renovation
del Convention de Lomé. Le futur Convention
debera continer le principios fundamental
de un disveloppamento human e sustenibile;
in fin le Union debera tener conto del
interesses economic e commercial del paises
interessate in tote le accordos conclusive a
nivello international.
Le reformas previste per le Commission con
Agenda 2000 entrara in vigor solo in le
secunde medietate de 98 — ha accentuate Giulio
Fantuzzi (PSE/I) — ma non se pote esser
inerte usque alora e in vice se necessita ager a
favor de un nove pacto social que debe esser
firmate inter agricultura e societate, rendente
plus efficace le financiamentos ja existente pro
le sector agricole que devera
devenir plus selective e transparente. Non es per
dismantellar le politica agricole
commun per medio del liberalisation que se
satisface le interesses del consumitores, ma in
vice per promover un politica de qualitate
del producto, como deberea haber nos
inseniate le caso del vacca folle.
|
