A su inauguration in 1883 le
Ponte Brooklyn esseva considerate le octave
meravilia del mundo e le symbolo del spirito
pioner del SUA. Illo representa anque le
construction de pontes inter le Vetule e
le Nove Mundos, viste que su constructor John A.
Roebling es originari de Mühlhausen in
Thuringia.
Traducite de Europa Forum
per Chris Burd
|
Post le cambiamentos
profunde sur le scena international, le
relationes inter Europa e le Statos Unite
disveloppa se in un contexto toto differente de
illo que marcava le 50 annos post le fin del
secunde guerra mundial. Le dissolution del bloco
del Est Europee, pauco ante le
disintegration del Union Sovietic ipse, le
fin del guerra frigide e del confrontation
inter le duo blocos ha facite surger un situation
completemente nove, e que exige un redefinition
del relationes disveloppate in le epocha del
postguerra. Le Parlamento Europee ha
tenite conto de iste nove situation, publicante
pensatas fundamental in "Europa e SUA: Le
via al futuro" (Reporto Souchet, PSE/D) e
exprimente los concretemente per le exemplo del
relationes economic e commercial transatlantic
(Reporto Erika Mann, PSE/D). Assi, le
Parlamento Europee se monstra convincite
que un cooperation plus forte es necessari ubi
nove prioritates se presenta super le terreno de
securitate que representa un menacia al pace e
que concerne al mesme tempore le Statos
Unite e le paises europee. Durante
decennios le OTAN constitueva le axe del
relationes inter le Statos Unite e Europa.
Aspectos ulterior del relationes transatlantic
pareva secundari ab le puncto de vista de
Washington. A causa del cambiamentos sur le mappa
geopolitic, le SUA es le sol superpotentia
restante, e ab le perspectiva europee
illos accentua su position de hegemonia
a vices troppo fortemente. Assi, le Parlamento
critica le facto que le election de nove membros
del OTAN esseva arrangiate unilateralmente, de
maniera que usque hodie on ha prendite necun
mesuras concrete pro realisar le decision del
atlanticrates de Berlin re le establimento de un
structura defensive europee. Hodie le
attention del relationes transatlantic
debe diriger se a nove menacias de diverse
naturas. Dunque plaita le Parlamento Europee
pro un inventario precise de collaborationes
futur, pensante multo specialmente al terrorismo,
al criminalitate organisate, al narcotraffico,
al lavage de moneta, al immigration illegal, al
disveloppamento de retes mafiose e al
proliferation de armas nuclear. Le Parlamento
Europee declara que le Union Europee
e le SUA deberea aspirar a formar un spatio economic
transatlantic. In iste contexto totevia
debe esser attingite un consenso absolute sur le
application del regulationes alimentari – il
declara se ja con belle regularitate le guerra
commercial re le carne con hormones, e le pullos
e le mais geneticamente manipulate del
americanos. Le Parlamento Europee sasi le
suggestion del Commission pro interprender le
"construction de pontes trans le Atlantico"
sur varie nivellos. Le creation de un "sito
web parlamentari transatlantic"
poterea representar un prime passo in iste
direction.
|
